Наши публикации
Перевела Алена Шомысова Светлана Григорьева, Марий –Эл Кодi мый радейтö Ваня радейтö бананъяс, А Борис - ирисъяс, Африкаысь ананасъяс, Чöскыд барбарисъяс. Костя сёйö абрикосъяс, Вовалы тшöтш пайдö. А ме сёя чöскыд блинъяс, Аттьöала бабöс. *** Василий Козлов, Коми-Пермяцкий округ Тайö локтiс муслунöй Мый жö лоис, мый жö лоис, мый жö лоис? Еджыд лымйöн льöм пу рöмсö ассьыс койис, Мича рытöн тырис гажа чужöмöй? Тайö локтiс, тайö локтiс муслунöй. Мый жö лоис, мый жö лоис, мый жö лоис? Кöдзыд ваöн морöс вазьöдны мен колiс, Мед эз сотчы биын менам сьöлöмöй?¬- Тайö локтiс, тайö локтiс муслунöй. Мый жö лоис, мый жö лоис, мый жö лоис? Мыйла сэтшöм югыд быттьö тайö войыс, Колипкайлöн войбыд сьылöмыс оз лöнь?- Тайö локтiс, тайö локтiс муслунöй. * * * Кодкö талун войнас сьылiс дыр, Ветлöдлiс пыр пемыдiнын öтнас. Сьыланкывйыс вöлi тöждöн тыр, Кодкö сьöлöм сайкöдöма, кылiс. Чеччи, восьтi öшинь гусьöнджык. А тэ узин…Азыма ме кывзi… Рудзöг дук да ылыс билöн тшын Войся рукöд керкааным кыссис. Сьöлöмын мый садьмöдiс, ог тöд, Сiйö гöлöсыс, да лолöй мыйкö пессис- Муслун быттьö лэптiс ассьыс öд. Тэысь дона некод абу сэсся. * * * Он нин ветлы сэсся, он нин ветлы. Миян кадным лэбзис еджыд юсьöн. Ог нин сьывлы сэсся, ог нин сьывлы Войся кадö тэныд гусьöн-гусьöн. Он нин виччысь сэсся, он нин вичччысь Войшöр кадö öзйысь кодзувъяссö. Он нин вöтлысь сэсся, он нин вöтлысь Рытсянь асылöдзыс тöлысь бöрся. Он нин окав сэсся, он нин окав Тэнад вом доръяслысь öмидз рöмсö. Ог нин пандав сэсся, ог нин пандав Бöрö кольöм воддза радейтчöмсö. Муш Нади, Удмуртия * * * Дзуртö Ставыс дзуртö: крöватьöй, öдзöсöй... и муслунöй ме дорö пырас кö, ог восьты пельясöс- ставыс ёна дзуртö. * * * Общагаын, тöрöканöсь öшинь дорын, эм яблöг тор. И стеклö пыр, кöн тшынöн йиджтысьöма öшинь, ме вылö дзоргö- ме кодь жö чашйöм, гöгöр курччалöм, мудзöм яблöг торыс. * * * Ылысмöны гымъяс, вой шöр кад дзирдалысь да горзысь мудзöм карын. Ёрта-ёртлы зарни тöлысь пытшкын ловлысь гуся шыяс восьтам лэбачьяслöн кывйöн. * * * Тэнад кывъяслы сэтшöм окота эскыны… Менам эскöмлöн сьöлöм сотыштöма. «Радейта» шуöмыдлы сэтшöм окота сетчыны… Но мыгöр-лолöй оз тöрны öдзöсад. «Вай кутам овны» шуöмыдлы сэтшöм окота шуны «вай»… Но збыльыс - аслад. Вöляыс - менам. 24.02.2005. Удмуртъясöс шуöны сьылысь войтырöн, удмуртлöн сьыланкыв век удмурткöд. И эстонъяс, шуöны, сьылöны. Тайö войтырлы сьыланкыв вайис мезд. 2005 вося урасьöм тöлысьö ме аддзылi сизимдас эстон мужичöйлысь сьылöмсö. Найö юр кышöдтöг, синва пыр, дöрапасöн киас сьылiсны. Ме кöсъя жö сулавны сьылысь удмурт мужичöйяс дор мышъясöн. Ме кöсъя жö овны мездмöм удмурт мужичöйяс муын. Пöсь вой Пöсь биöн сэки öзъялiс пач. Öдзöс сайын кылiс уна гöлöс, зэр… Тэ кажитчин меным сэки ыджыдöн, еджыдöн-еджыдöн. Ме, кöнкö, кажитчи тэныд югыдгöрдöн, турунвижöн… Тайö бöръя сьыланкывйыс - югыдгöрда-турунвиж. Медводдза лöньöмыс - сiйö еджыд-еджыд. Аддзим-ö ми тайö ставсö öтчыдысьöн, öтлаын?- Миян костын ыпнитiс бордъяса гöрд би. Ылысянь мед кутас сiйö тыдавны югыдгöрда-турунвижöн, матысянь мед öзъялас еджыдöн-еджыдöн- миянöн пестöм би- мед сöмын мед козьналас и мукöдлы сöмын шуд. Готланд Ме корси татысь Удмурт нима улича. Татшöмыс танi абу вöлöма. Но ме тöдi, юрвемöн кылi: ме танi вöлi, ме танi вöлi коркö, ог тöд, кор. Тайö изъя стенъяссö ме тöда, ыргöнысь мича чунькытш-исерга вöчысьсö тöда жö, сёйысь тасьтi-пань вöчысьöс тöда жö, и тайö чöскыд сёян пуысь дорас ме пыравлi нин коркö водзынджык, и тайö сьыланкывъяссö ме кывлi нин. И тайö пу керкаяссö ме тöда нин. Ме аддза татчöс олысьяслысь синъясас шаньлун, абу тэрмасьысь вöрасног. Танi, тайö ылысса му вылас, менам асвежöртöмлöн керка аддзис быттьöкö ассьыс важся артмöмлысь из. Виктор Шибанов, Удмуртия Пасьмунiс Пасьмунiс кельыдлöз чашка, Сiйö öшиньсянь уси. Сöмын «пусь-пасьыс» и кывлiс Да дас тор вылö чаштiс. Вöлi чашка. Сы пыдди Öнi торпыриг колис. Вöвлöм кельыдлöз серпас Видзö на, кöть сiйö потiс. Сiйö олöмсö ассьыс Уна мортлы на восьтас. Но выльысьсö пасьмунны Сiйö оз вермы, сы вöсна, Мый пасьмунны кужанлун Öд сэтшöм жö озырлун. А торыс? Торыс йылысь Сёрниыс лоас выльысь. Пасьмунiс кельыдлöз чашка. Сiйö некор оз вунлы. Öнi пасьмунны выльысь Сiйö некор оз вермы. * * * Ме тшын- Му да енэж костын. Ме тшын- Пöсь да кöдзыд костын. Ме бергалiгмоз кыпöдча Да куштысь тöв кузя резся, А вылысяньыс видзöда Пыр пыдöджык и ылöджык. Ме змей моз кельыдлöз шорöн Öдйö кыпöдча енэжö. Корсюрö шуштöм, косны кö Бипур дорö, гöрд би пытшкö, Пöим пиö дзебси эськö- Но мыйлакö оз позь. Ме тшын. Мыйла ме торйöдчи биысь? Эм-ö сiйö либö кусiс? Мыйла менö кыскö вывлань? И ме збыльысь лоа зэрöн? Ме- тшын Му да енэж костын. Ме тшын- Пöсь да кöдзыд костын. «Öтуволанiн» циклысь Менам судьба- öтуволанiн. Сiйö локтiс гулагъяс пыдди, Сiйö вежис кызьöд нэм помын Психбольничалысь клеткаяс. Танi кадыс водзö оз мун, Сiйö вешйö кытчöкö бокö. Босьтлы киад суниса ем- Сiйö ачыс вурас пöлöса. * * * Пестерö кö тойлан дзик тырыс Аскиа эскöмлысь помасьöм, Ёртъясыд дорад лёк лöгасьöм, Дзеескыдлун да дой; а вылысас Юр висьöм, юр висьöмыдлысь ру (Скöрлун öшöдöм öш моз лолалö), Тыртан да ставыс кö талявсяс, Тайö пестерыс- öтуволалiн. * * * Тэ мыськалiн джодж Кольквиж ветьöкöн. -Джодждöра пыркнитны? Ватö вежны? -Эн. Видзöдласыд тöрытъя кодь Зэра да кымöра. Но кор уджалан, сёысь Мичаджык вöлöмыд! Няйт ваа тазъяс ме Кокъясöн пыри, Сувтöдöм бедь либö Ветьöк кодь вöлi. Джынвыйö тэ нюмъёвтiн, Пуксин джодж вылö, Киястö лэдзин да: -Висьтав, мый колö? Пётр Захаров, Удмуртия Коймöд син восьтöм Кöрттув, бытшкав, Кöшöй, гумовт, Цыпа, койышт, Кос ру, паськав, Эй, корöсь, корöсь, Швачкышт, Вени! Ой-ё-ё-ё-ёй, Ё-к-л-м-н! Вачкышт нöшта, ях! Гумовт нöшта, ай! Цыпа, Цыпа, ах! Терпит, арса зон! Я! Я-я-я-яй! Ё! Ё-ё-ё-ёй! Ё-к-л-ме-нö! Ё-к-л-ме-нö! Бытшкы, бытшкы на! Вачкы, вачкав на! Брызнит, брызнит на! Сьöлöм- кынöмöй! Пузя, мынтöдча, Пывсян, тэ понда! Ё-к-л-м-н! Ё-к-л-м-н!
